2012年3月16日 星期五

我唔鍾意徐志摩

諗左好耐,唔知寫唔寫好。因為好似好長氣,又怕大家無興趣知道。但係提開又有人問起,我又諗就算開心唔開心都係貓家貓的生活一部份。

係,以後亞妹會多個名,叫做瀨尿蝦。自發現佢偷偷係我衫度尿尿,將佢地同大小姐隔離,都知唔會咁快將佢習慣改變。諗番佢呢個習慣,其實係從佢一入屋已經開始。因為佢第一次尿尿時已經係條毛巾度。

直到而家都唔明,佢有時會正正常去廁所尿尿,有時又唔鐘意去。點解呢?但係佢又唔係日日都做徐志摩個喎。佢唔鍾意而家隻貓砂?我已經轉左四隻牌子。四隻牌子都唔鐘意?廁所唔乾淨?每日返去第二件事(第一件事係要同大小姐打招呼。)就係去清廁所,之後就食維他命膏。

事發係前晚,繼向家姐施展鐵火掌之後,今次請亞妹食椒鹽瀨尿蝦。當時我剛清理好個廁所,擰轉面,佢就係個風扇隔離尿尿。算‥‥!係我手腳慢!你忍唔切。清潔好廁所,食左維他命膏後,佢又去廁所便便喎。所以,有時我諗佢係咪要等我返黎先去呢?但係砂盆度又見到佢有尿尿過,所以沒理由唔識去。咁唯有去清理左佢啦。

到臨瞓果時,佢又係個風扇隔離尿尿,真係火都黎!我一手捉住佢頸後面就拎起,大喝:曳曳!

係咪覺得佢死梗呢?!佢真係唔驚我呀!眨左下眼,望住我。唉!咁我捉佢個頭聞下尿尿,用手拍佢個鼻樑,又話曳曳。希望亞妹知我唔高興,唔鍾意徐志摩啦!要一隻瀨尿蝦唔瀨尿有無可能呢?

有時我又會好消極咁諗,佢驚咗唔係呢道尿尿,匿埋唔知邊道尿,若果有一日佢係電掣道尿尿,咁到發現時就為時已晚。但係正能量又出現,做人又唔可以咁悲觀。然既亞妹係識去廁所,會唔會只係發脾氣唔去呢?會唔會好似狗狗咁有分離焦慮證?唔通見到我開心到瀨尿?

17 則留言:

  1. *hugs*

    咦,其實同徐生有咩關係呢?

    我無咩constructive嘅野可以講呀,但俾d信心阿妹啦~~

    回覆刪除
  2. Cat:

    我都有同你諗唔同方法, 試下LOR...(不過我養貓貓經驗唔夠你多, 在下只不過有4個月! HAHa)

    1. 試下用有尿尿既衫, 放去砂度, 等妹妹知道要係砂痾尿?

    2. 佢係砂痾完, 讚下, OR 俾TREATS佢食..(不過, 貓貓去砂WEE/POO係好天然既事, 如果下下有TREATS食, 會唔會寵壞佢地呢?)

    3. 我朋友貓貓真係等佢主人先返去WEE/POO, 呢個都成立.

    4. 買多個TOILET, 只係俾妹妹用, 貓貓好中意乾淨. 如果有咩DIRTY 可能佢地都唔去WEE?

    5. 我再諗下/問下我朋友啦....加油.

    我都知, 有時真係好憫, 好似我貢, 依家栗子都仲係好驚我, 會問自己係米唔夠愛佢? 而偏心番薯? 所以攪到栗子要遠我2尺. 不過又可能唔同貓有唔同性格, 我都唔強求. 反而, 我想發脾氣時, 諗一諗, 我發5秒脾氣打佢, 可能我要5個月先TUM番佢. 好唔抵. 所以我依家EQ都好左.

    依家我會順其自然....

    你都要加油!

    回覆刪除
    回覆
    1. 佢間歇性發作,唔係晚晚都做瀨尿蝦。
      我仲未搵到原因,尋晚又正常。
      我而家都諗緊尋晚同正常既日子有咩分別。

      刪除
  3. 唉呀,我試下幫你問下其他貓主人有乜計啦

    回覆刪除
    回覆
    1. 送返亞妹俾你,等你日日昅住佢。
      唔做瀨尿蝦先俾返我!
      嘻嘻!講吓啫!

      刪除
    2. 你捨得咩,放番去原居地囉呵呵

      刪除
  4. 嘗試把貓厠放在她常洒尿位置。

    回覆刪除
    回覆
    1. 其實現在廁所的位置,就是亞妹上次偷偷尿尿的地方了。

      Cat

      刪除
  5. 我估貓同狗既生活習慣好唔同, 所以應該都比唔到咩意見你... 唔好咁嬲啦... 細妹好快會乖乖架啦

    不過呢.. 我個仔有時瞓到傻左同埋發脾氣, 都會亂咁屙...
    有時又好好笑咁走入去人既廁所(既地板)去CC...(佢果廁所係廳!)
    所以.. 好難估佢地想點...........

    回覆刪除
    回覆
    1. 唔嬲囉。鬧完佢曳曳,佢雙無辜眼望住我,即刻乜都唔記得晒。
      因為我以前養啲貓貓就算打交都好,都未試過做徐志摩,又諗極都唔明問題係邊,感覺有啲氣餒。

      臣大少咁搞笑,發脾氣會亂咁痾!
      仲同妳地爭廁所添?

      有時諗佢地識講幾句都幾好喎。但係又可能到時又俾佢地激死咗!

      刪除
    2. 繼續加油, 細妹仲細個, 大D可能好D.. 唔使氣餒!! 有時望住佢地真係乜野都嬲唔落!!!

      係喎.. 次次佢比佢老豆鬧完,就會亂咁屙...哈哈哈.. (好彩唔使我善後!)
      佢其實都會出聲架... 你唔理佢, 佢就會吠你架啦!!! 有次同佢去游船河落海灘游水, 佢係沙灘, 我地游開.. 睇下佢搵唔搵我地, 點知佢好似狼叫咁, 叫我地... 好好笑..

      刪除
    3. 佢可能以為你浸親想救呀。
      泰臣好搞笑!

      刪除
  6. Cat:我未養過貓,無咩意見可以畀你,不過,我覺得你好愛護小動物,相信你最後一定會拆得掂既。

    回覆刪除
    回覆
    1. 如果同妳對魚魚黎比,我仲差好遠呀!
      有時我都諗,不如由得佢係果度殊殊算.......

      刪除
  7. 諗極唔明, 最後一著--> 搵果D 識動物傳心術嘅人啦, 聽講話佢地勁果D齋睇相都知隻寵物有咩心事o架~

    回覆刪除
    回覆
    1. 我都有聽過動物傳心術,但係有好多都話呃人。都唔知信邊個,好似尋晚,佢又乖乖地識去廁所。

      刪除